Тылчаан

Биир алааска, биир дьиэҕэ олорбута эбитэ үһү Тылчаан.

Биир үтүө күн Тылчаан зоопаркаҕа сылаас дойду кыылларын көрө, оонньуу барбыт.

Арай тиийбитэ, улахан да улахан айахтаах бегемот ууга олорор эбит. Бегемот балык тутан сиэри айаҕын киэҥник атар-сабар үһү.  

Тылчаан уҥа диэки көрбүтэ, утуйан турбут баҕачааннар күнү көрсө, тиистэрин көрдөрөн мичээрдэһэ олороллор үһү.

Быа курдук субуруспут эриэн кыыллар уһун, синньигэс тылларын таһаара-таһаара, киллэрэ-киллэрэ астарын кэтэһэн сыылла сылдьаллар үһү.

Дьэрэкээн дьүһүннээх сибэкки быыһыгар улахан кыыл слон уһун, чорбойбут тумсутунан сибэккилэргэ уу кутар үһү.

Тылчаан кулгааҕынан иһиттэҕинэ, суолга туйах тыаһыыр эбит. Баран көрбүтэ, оҕолор атка хатааһалыы сылдьаллар үһү. Тылчааммыт эмиэ атка олорсубут.

Арай Тылчаан сиэркилэҕэ көрүммүтэ, баттаҕа тыалга ыһыллан хаалбыт, тарааҕынан тараан, көннөрөн биэрбит.

Тылчаан чаһытын көрбүтэ дьиэлиир бириэмэтэ кэлбит эбит.

Тылчаан дьиэтигэр баран иһэн араас быһыылаах, дьүһүннээх шариктары ылан, үөрэ-көтө сүүрэ турбут.